Awan ti nadangran ti napasamak nga aksidente a nakairamanan ti SUV ken motorsiklo iti national highway idiay Barangay Poblacion Norte, Santiago, Ilocos Sur itattay bigat, June 23, 2026.
Ti nagmaneho ti Ford Everest 2.0L Titanium Plus 4×4 10AT ket babai nga agtawen iti duapulo ket siam, naasawaan, negosyante, addaan ti non-professional driver’s license ken agindeg idiay Barangay Bigbiga, Santiago.
Ti met nagmaneho iti Misukoshi Euro Sport ket lalaki nga agtawen iti innem a pulo ket walo, naasawaan, mannalon, awanan ti driver’s license; kaduana ti backride-na a babai nga agtawen iti innem a pulo ket dua, naasawaan nga agpada nga agnaed idiay Barangay Bigbiga, Santiago.
Sakbay iti aksidente ket nakaparking ti SUV iti sangwanan ti restaurant iti masakupan iti maysa a gas station idinto a ti nakamotorsiklo ket nakaposisyon iti southbound lane tapno bumallasiw.
Manipod panagparking ti SUV ket simrek iti national highway babaen ti panagdalyasatna manipod inner lane iti northbound, ngem kellaat a pinanggep ti nakamotorsiklo a nagballasiw iti highway a gappuanan iti pannakaidungparda iti left passenger door iti SUV.
Gapu dayta ket nagasgasan ti lef passenger door iti SUV idinto nga awan ti damage ti motorsiklo.
Dagiti dua a lugan ket agpada a naipan iti Santiago Municipal Police Station tapno maidalan iti husto a proseso.
