Awan ti nadangran iti napasamak nga aksidente a nakairamanan iti SUV ken closed van iti national highway idiay Barangay San Pablo, San Esteban, Ilocos Sur itay malem, June 30, 2026.
Ti nagmaneho iti Silver Metallic Toyota Fortuner ket lalaki nga agtawen iti uppat a pulo ket lima, naasawaan, mannalon, addaan ti driver’s license nga agnaed idiay Barangay Balaleng, Bantay.
Ti met nagmaneho iti White Faw Closed Van ket lalaki nga agtawen iti limapulo ket dua, naasawaan, addaan ti driver’s license nga agnaed idiay Barangay Quezon, San Isidro, Isabela.
Sakbay iti aksidente, agpapabagatan a direksyon dagiti dua a lugan idin nagin-innayad ti SUV ta adda nagballasiw a lugan iti sangona a naggapu iti laud nga agturong iti amianan, idin ti closed van a sumarsaruno ket natukbobna iti likodan a paset ti SUV.
Gapu dayta ket adda damage dagiti dua a lugan ngem saan pay nga ammo no mano ti gatad iti nadadael a paset.
