Agpada a naipaagas iti ospital dagiti nagmaneho ti traysikel ken motorsiklo kalpasan iti aksidente a nakairamananda iti national highway idiay Barangay Lacong, Tagudin, Ilocos Sur idi kalman, June 21, 2025.
Ti nagmaneho ti black Honda TMX155 tricycle ket ni Mario Rummer Ringor Somera, naasawaan, agtawen iti innem a pulo, naasawaan, mannalon nga agnaed idiay Barangay Gabur, Tagudin.
Ti met nagmaneho iti balck Suzuki GSX-1000 Big bike ket ni Waddy Paul Agaloos Molina, agtawen iti uppat a pulo ket walo, naasawaan, negosyante nga agnaed idiay Barangay Bulag East, Bantay.
Iti pannaki-uman ti Bombo Radyo Vigan ken ni PMaj. Kleyvan Paycao Dalang a hepe iti Tagudin Municipal Police Station, agpada nga agpapabagatan a direksyon dagiti dua a lugan a ti akin-sango ket ti nakatricycle idin nadanonda iti nasao a lugar ket nagsikko ti nakatricycle isu a nadungpar iti nakamotrsiklo.
Nagsagaba ti dunor iti pingping ti nagmaneho iti traysokel idinto a na-fracture iuti nakabigbike isu nga agpadada a naipan iti ospital para iti pannakatamingda.
Naduktalan a naka-inom iti arak ti nagmaneho ti traysikel idi napasamak iti aksidente idinto a napaspas met iti panagpataray ti nakabigbike.
Saan pay laeng a nakapagsarita dagiti dua para iti pannakasimpa dagiti lugan ta nagtulagan ti pamiliada nga agpatangto lattan dagiti dua a driver apaman a makaruarda iti ospital.
Palagip ni Dalang kadagiti agmanamaneho iti kanayon a panagannad ken panaginnayad tapno saan a maaksidente.
VIDEO – PMAJ. KLEYVAN PAYCAO DALANG
