VIGAN CITY – Agtultuloy pay laeng iti imbestigasyon dagiti otoridad inaig dagiti dua a lugan a naala da kalpasan iti pannakatambang ni dati a Pangasinan governor ken representative Amado Espino idi September 11 idiay San Carlos City, Pangasinan.
Dayta ket kalpasan a kinumpirmaran ni Police Lt. Col. Mary Crystal Peralta, pannakangiwat ti PNP- Region 1, a nabigbig dan nu siasino dagiti nakainaganan ti nalabaga a Hyundai Elantra a nakita da idiay Barangay Pasima, Taluy, Malasiqui, Pangasinan ken ti metallic blue Ford Everest a mapapati nga inaramat a get-away vehicle dagiti suspek iti pannambang.
Segun ken ni Peralta iti pannaki-uman kenkuana ti Bombo Radyo Vigan, kayat da a maamuan nu da Marivic Villanueva kenni John Paul Regalado iti akin-kukua dagiti nasao a lugan wennu dagitoy ket maibilang a hot cars wennu tinakawan.
Immunan nga inwaragawag ti opisyal a ti uneg dagiti nasao a lugan ket adda pay dagiti nangangato a kalibre iti armas a naala dagiti kameng ti Scene of the Crime Operatives (SOCO).
Ti uneg ti Hyundai Elantra, naala iti uneg na ti dua a m16 baby armalite, dua a m16 standard rifle, lima a short magazine ti m16, uppat a short magazine, long magazine ti m16 ken 34 live ammunition ti m16 idinto nga iti uneg ti Ford Everest ket naala ti maysa a fragmentation hand grenade, dua a m14 rifle, uppat a magazine ti m14, m16 rifle, baby armalite ken tallo a magazine assembly ti m16 rifle.
