Mangipila iti gakat dagiti mangibagi iti Akbayan partylist iti Kamara tapno pagbalinen nga special non-working holiday ti Pebrero 25, nga anibersaryo ti EDSA People Power Revolution.
Manamnama a maipila ti gakat inton sumaruno a lawas sakbay ti maika-40 nga anibersaryo ti nakappia a rebolusyon a nangpatakyas iti diktador ken ama ni Presidente Bongbong Marcos Jr a ni dati a Presidente Ferdinand Marcos Sr.
Iti Proclamation No 1006 nga inruar ni Presidente Marcos Jr idi September 3, 2025, naibilang ti EDSA People Power Revolution Anniversary kas Special Working Holiday laeng.
Kayatna a sawen ket adda serrek, saan laeng nga iti trabaho no di ket iti pagadalan isu a kayat ti grupo ti Akbayan partylist Congressmen a pagbalinen daytoy nga special non-working holiday.
Ipagpaganetget ti grupo a napateg iti pakasaritaan ti Edsa People Power Revolution ta isu ti nangidalan iti pannakapatakyas ti maysa a naibilang a diktador.
