VIGAN CITY – Naipilan ti agtutuon a kaso kadagiti tallo a suspek iti panagtakawan idiay Bauang, La Union a natiliw idiay Barangay Bonifacio, Cabugao babaen iti Intel Driven checkpoint.
Nabigbig dagiti suspek a da Marlon Padaco, agtawen iti tallopulo ket maysa, taga-Barangay Lagawa, Bauko, Mt. Province; Milton Padaco, agtawen iti tallopulo ket lima, taga-Bauko, Mt. Province ngem agdama nga agnaed iti Tamurong, Candon City; Ceasar Mangamling, agtawen iti uppat a pulo ket maysa, taga-Barangay Dapapan, Bauko, Mt. Province.
Iti pannaki-uman ti Bombo Radyo Vigan ken ni PMaj. Juan Jhayr Maggay iti Cabugao Police Station, dagiti maipila a kaso kadakuada ket ti panaglabsing iti Republic Act 10591 wenno Illegal Possession of Firearms and Ammunition Act; Republic Act 9165 wenno Comprehensive Dangerous Drugs Act of 2002; RA 9516 wenno ti Possession of Explosives; ken iti Article 151 wenno ti Diseobeying Persons in Authority.
Naduktalan dagiti pannakabagi ti linteg a dagiti suspek ket datin a grupo ti agtatakaw ta tay naala a caliber 45 ket tinakawda idi December 24 idiay Bauang, La Union idinto a ti glock 9mm ket tinakawda met iti maysa a transient house idiay Pagudpud.
Modusda pay ti agcheck-in kadagiti hotel ken ti panagdeliverda iti nateng idiay Baguuio a pangkitaanda kadagiti mabalin a mabiktima.
Iti agdama, dukduktalen pay laeng ti Cabugao Police Station no dagiti suspek ket dati payen nga agar-aramat wenno agilaklako iti iligal a droga.
