VIGAN CITY – Nakaimasayagen iti bangkay ni Caridad Cortez nga agtawen ti lima pulo ket lima iti pagtaengan da idiay Barangay Paing, Bantay ta natay ta nadungpar iti nagluganan na a tricycle a minaneho ti anak na a ni Alfredo nga agtawen ti dua pulo ket siyam idi parbangon ti September 19 idiay Barangay Sinabaan, Bantay.
Napasamak iti aksidente a nakatayan ti biktima idi dinungpar ti Hyundai Accent a minaneho ni Heleyna Arubio nga agtawen ti lima pulo ket maysa a taga- Pug-os, Sinait iti nagluganan da a tricycle.
Segun ken ni Alfredo, agpapa-amyanan da nga agina ta mapan na kuma ipa-dialysis ti ina na idi nasabat da ti kotse ni Arubio nga agiwes-iwes.
Saan nga ammo ni Alfredo iti paglisyan na agsipud ta agiwes-iwes ngarud ti kotse agingga a nadungpar da.
Nagdire-diretso iti kotse ket naisurot ti tricycle agingga a nabaliktad ti kotse ket kasla napitpit iti sumagmamano a paset iti tricycle a nagluganan dagiti agina.
Agsipud iti kinapigsa iti impact iti panagdinnungpar dagiti dua a lugan, naipurwak iti ina ni Alfredo ket saan da nga insigida a naitaray iti ospital ta awan iti pulis wennu rescue a nakapagresponde nga insigida ta nasipnget pay idi napasamak iti aksidente ken awan unay iti aglablabas a lugan.
Naitaray iti ospital ti biktima ngem natay ta posible a saan na a kinabaelan iti pannaka-aksidente da idinto a ni Alfredo ket agalen na met ti ulo ken saka na.
Segun met ken ni Arubio, agpa-Manila da kuma nga agina idi nakadanun da iti nakapasamakan iti aksidente ket saan na a nakontrol iti manibela ti kotse isu a nagiwes-iwes agingga a nadungpar na dagiti agina.
Mainaig dayta, agpapatpatulong met ni Francisco Cortez, asawa ti biktima, ken ni Arubio ta nu saan kuma a gapu kenkuana ket saan kuma a natay ti asawa na nga ikarkarigatan na nga ipadialysis tapnu umatiddog pay kuma iti biyag na.
