Nadunor ti maysa nga agtawen-iti-sangapulo ket dua nga estudiante kalpasan nga aksidente a mapaltugan ti kannawan a sakana iti uneg ti pagtaenganna idiay Barangay Dacutan, Magsingal, Ilocos Sur.
Nabigbig ti biktima a ni alyas ‘Frendile’ idinto a ti suspek ket ti uliteg ti biktima a lalaki nga agtawen iti uppat a pulo ket maysa, agpada nga agnaed iti nasao a lugar.
Iti pannaki-uman ti Bombo Radyo Vigan ken ni PCPT. Melvin Trinidad, agar-aramid iti assignment-na ti biktima iti uneg ti pagtaengan idinto a simmangpet met ti nakainom nga ulitegna ket mapapati nga ay-ayamen ti maysa a revolver.
Mapapati nga inikkat ti suspek dagiti bala manipud iti paltog ket natalek a naikkatna amin daytoy isu a namin-ano a kinalbitna ti trigger-na ket bigla a pimmutok ken natirwan ti kannawan a saka ti biktima.
Nagpaarayat met ti biktima iti pagtaenganda isu a naitaray iti balay pagagasan.
Nakemmeg ti suspek kagiddan ti agtultuloy nga imbestigasion dagiti pannakabagi ti linteg iti napasamak.
Kabayatanna, agkidkiddaw met iti pammakawan manipud iti kabsatna ti suspek gapu iti saanna a naigagara a pasamak.
Segun iti suspek, namnamaenna a makapatangnanto a nasayaat ti kabsatna nga ama ti biktima tapno saanto a riri kadakuada daytoy nga agkabsat iti masangwanan.
Innayon ti suspek a ti ikotna a paltog ket sinaldaanna idi agingga a saan metten a nasaka isu nga iggemna pay laeng daytoy.
Nupay kasta, desidido met ti ama ti biktima a pilaan iti kaso ti kabsatna.
Segun iti ama ti biktima, ituloyna daytoy nga addang ta kayatna nga agnakem ti kabsatna ta no makainom ket pasaray a dagiti ubbing iti pagipapasanna.
Nadakamatna pay nga idi napasamak ti insidente ket ingaw-gawid ti maysa pay a kabsatda ti suspek a mangay-ayam iti paltog ngem saan a nagpaanawa isu a napasamak ti krimen.
