Naduktalan dagiti pannakabagi ti linteg ti Narvacan nga adda iti impluwensia iti arak ti maysa nga agtawen-iti-duapulo ket lima a lalaki a nagbekkel idiay Barangay Sarmingan, Narvacan, Ilocos Sur.
Ti biktima ket single ken awan pay ti asawa ken putotna.
Iti pannaki-uman ti Bombo Radyo Vigan ken ni PSSG. Allen Rosal, napasamak ti insidente iti bisperas ti panangsarabo iti baro a tawen ken maipagarup nga awanen ti nakasiput iti inaramid ti biktima gapu iti panagselebrar dagiti agindeg kabayatan iti New Year’s eve.
Sangapulo a kadapan ti kangato ti nangibitinan ti biktima iti bagina iti kayo ti mangga, ket nasarakan laengen ti bangkayna iti ala una iti malem iti kabigatanna babaen kadagiti dua a barito a kalugaranna.
Naitaray pay laeng iti balay pagagasan ti biktima ngem dead on arrival ken naipasigurado met awan ti foul play iti pannakatayna.
Innayon ni Rosal masansan a madakdakamat ti biktima a kayatnan ti agpakamatay gapu iti parikutna iti pamilia ngem idi damo ket nalapdan pay laeng dagiti kasinsinna iti daytoy a plano ti biktima.
