Maysa nga agtawen-iti-duapulo ket dua a lalaki a mapapati a nagbekkel iti maipatpatakder a coliseum iti Barangay Tamag, Vigan City, Ilocos Sur.
Ti lalaki ket agdama a mangmangged iti nasao a construction site, ken taga-San Pascual City, Sorsogon.
Nakaawat ti Vigan City Police Station iti report mainaig iti natay a lalaki a nakabitin iti uneg ti construction coliseum kangrunaan iti second floor amianan a paset babaen kadagiti kaubraanna.
Dagus a nagresponde dagiti pannakabagi ti linteg ken nakikammayetda iti Vigan City Health Office ket naideklarar met a natay ti nasao a lalaki.
Iti pannaki-uman ti Bombo Radyo Vigan ken ni PLT. Amado Somera, Deputy Chief of Police ti Vigan City Police Station, awan ti ammo ti pamiliana a parikut ti biktima ngem segun iti maysa a kaubraanna ket nadlawna nga agmalmalanga kadagiti naglabas nga aldaw.
Mayur-uray met ti desisyon ti pamilia ti biktima no kayatda nga ipaidalan iti autopsy ti bangkayna tapno maamuan no adda foul play iti pannakatayna.
