VIGAN CITY – Dead on arrival ni Berna Shiela Daria Paac, agtawen iti duapulo ket dua, agnaed iti Barangay San Mariano, Bantay gapu iti pammaltog iti nasao a lugar.
Nakaawat iti tawag dagiti pannakabagi ti linteg manipud iti maysa a concerned citizen nga adda pammaltog a napasamak iti uneg ti livestock farm ti biktima.
Segun ken ni Judelyn Doria Daria, agtawen iti duapulo a kasinsin ti biktima, tinawagan isuna ni Florence Jane Daria nga isu ti nangibaga a ti biktima ket pinaltugan dagiti saan pay nabigbig a suspek isu a tinurongna met ti lugar a nakapaltuganna.
Idi nakasangpet, nakitana ti biktima nga adda tama ti paltog ti nadumaduma a paset ti bagina.
Naipaagas daytoy iti Ilocos Sur Provincial Hospital Gabriela Silang ngem saanen a nakalasat.
