VIGAN CITY – Adun dagiti nagreklamo iti opisina ni Governor Ryan Singson inaig iti anomalya nga inaramid dagiti miyembro ti Criminal Investigation and Detection Group ditoy probinsiya.
Segun ken ni Gov. Singson, ti kaso nga administrative ken criminal nga inpila iti kompanya a nangipatulod kadagiti sangapulo a lallaki a kinemmeg dagiti miyembro ti CIDG- Ilocos Sur idiay Santa Square Arena ken kinikilan da iti dua gasut a ribo a pisos ket sabalin to laeng iti kaso nga ipila dagiti sabali pay a complainant.
Inbaga ti gobernador nga awanen dagiti miyembro ti CIDG a naireklamo idiay Ilocos Sur Police Provincial Office ngem saan na a kayat a sawen nga agpatinggan isuna a mangkamat kadakuada.
Inkari na a saan na a sardengan dagiti opisyal ken miyembro ti CIDG nga utek dagiti naduma-duma a modus iti panagkikil kadagiti kemkemmegen da a suspek kadagiti naduma-duma a krimen.
