VIGAN CITY – Kritikal ti kasasaad ni Elizard Sonico, agtawen iti tallopulo ket walo, agnaed iti Sitio Ulayos, Barangay Maradodon, Cabugao gapu ti panangdangran kenkuana dagiti kabsatna a singin.
Dayta ket kalpasan ti pananganawa dagiti agsingin kenkuana gapu ti panagpaputokna iti paltog.
Nabigbig dagiti kabsatna a napaltugan a da Eddie Sonico ken Eddies Sonico, agpada nga agtawen ti uppat a pulo ket lima, agpada a naasawaan a taga Sitio Ulayos, Maradodon.
Iti pannaki-uman ti Bombo Radyo Vigan ken ni Police Major Juan Jhayr Maggay, mapapati a nagpaputok ti suspek iti namindua a daras iti paltogna isu a napan inanawa dagiti kabsatna a singin.
Immuna a napan nanganawa ni Eddie ngem napaltugan ti akin-kannigid a luppona idinto a simmaruno met a naganawa ni Eddies ket napaltugan met laeng ti imana.
Naagaw dagiti agsingin ti paltog a mapapati nga impak-olda iti suspek malaksid pay ti panangbugbog ken panangpak-olda iti mapapati a bato iti ulona.
Innayon ni Maggay nga awan ti susik iti nagbabaetanda nga agkakabsat ngem ti suspek ket nakainom iti dayta a gundaway.
