VIGAN CITY – Im-imbestigaran ti Magsingal Police Station no ania ti posible a nakatayan ni Madilyn Pastor, agtawen iti tallopulo ket walo a taga-Turod, Cabugao a nasarakan nga agruprupsa ti bangkayna.
Iti pannaki-uman ti Bombo Radyo Vigan ken ni PMaj. Joel Castillo, hepe ti Magsingal PNP, nasarakan dagiti agassawa a da Corazon Bragais, agtawen iti innem a pulo ket tallo ken ni Arnaldo a taga-Maratudo ti bangkay bayat ti panagalada iti pagsungrod a kayo iti kakaykaywan a paset ti Sitio Kayapa, Brgy. Maas-asin, Magsingal.
March 13 idi naipakaammo kadagiti pannakabagi ti linteg a mapukpukaw ni Lopez iti Bantay Municipal Police Station ta isuna ket agkaskasera idiay Buquig ken agtrabtrabaho idiay Bantay arcade.
March 9 ket makonkontak pay laeng ti anakna ngem March 10 ket napukawen ti komunikasyonda isu a mapatta-patta a makalawasen manipud idi natay.
Nupay kasta, maidalan iti autopsy ti bangkay ti biktima tapno maduktalan ti impatayna ta no mapaneknekan a biktima iti kinadamsak ket inkari ni Castillo nga aramidenda ti kabaelanda tapno maikkan hustisia ti pannakatayna.
