VIGAN CITY – Agruprupsan iti bangkay ni Carmensita Quinez, maysa a retirado a mangisursuro, a nasarakan iti uneg ti banyo iti pagtaengan na idiay Banuar, San Juan idi June 2.
Naamuan nga idi Biyernes, nakitulag ti biktima kadagiti pada na a retirado a mangisursuro nga isuda Luz Padua kenni Josefina Bueno nga umay da ditoy syudad ti Vigan ket idi alas nuwebe karenta y singko iti agsapa idi kalman, dinagas dagiti dua ti biktima iti pagtaengan na ket mamin-anu da a tinawagan ngem saan a simmungsungbat isu a nagpatulong da ken ni Barangay Kagawad Willy Rosario a nakaduty iti barangay hall tapnu makastrek da iti pagtaengan ket idi makastrek da, nakita da ti biktima iti uneg ti banyo nga awanen iti biyag na ken agruprupsa.
Patien ni Pol. Capt. Jade Macaraeg, hepe ti San Juan municipal police station a posible a naatake ti biktima gapu ta siguden nga adda high blood na.
Nu pay kasta, im-imbestigaran pay laeng dagiti otoridad nu adda foul play iti pannakatay ti biktima.
