VIGAN CITY – Makitaripnong to dagiti sumagmamano nga agricultural groups ken ni Agriculture Secretary William Dar tapnu mapagpapatangan dagiti posible a “long-term solution” para kadagiti mannalon a naapektaran iti panagbettak ti bulkang Taal.
Ti pannaki-uman ti Bombo Radyo Vigan ken ni Samahang Industriya ng Agrikultura (SINAG) Chairman Rosendo So, masapul a mapagpatangan a naimbag nu anya dagiti tulong a maipaay kadagiti mannalon agsipud ta saan pay a masigurado nu kaanu danto a makasubli manen kadagiti pinanawan da a pagtaengan da.
Kayat ni So nga adda iti maipaay kadagiti mannalon a livelihood assistance nga agpaot agingga iti makasubli da iti normal a panagbiyag da tapnu matulungan da a makabangon manipud iti pannakadidigra da.
Maibasar iti kaudian a rekord ti DA, umaboten ti 3.2 bilyon a pisos iti pakabuklan a gatad dagiti nadadael iti sektor ti agrikultura gapu iti agtultuloy a panagalburuto iti nasao a bulkan.
