VIGAN CITY – Saanen nga ituloy ni El Ray Batin iti panagpapili na kas bise mayor ti Santa inton May 13 ta idi May 11 ket nagipilan iti statement of withdrawal na idiay opisina ti Commission on Elections iti nasao nga ili.
Photo courtesy of Jesus B. Bueno Jr. (Officialk Facebook Page)
Maibasar iti official statement ni Batin, nabayagen a pinagpanunutan na iti panagsanud na gapu kadagiti sumagmamano a rason kas iti pannakakita na a ti partido a nakaikappengan na ket awan iti konkreto a plano da para iti pagsayaatan iti ili da a Santa ta ti kayat da laeng ket masukatan iti agdama nga administrasyon ken maikkat iti puwesto ti agdama ken agpapili a Mayor a ni Mayor Popoy Bueno.
Nagsakit pay ti nakem ni Batin iti mapapati a panangusar dagiti kapartidoan na kenkuana para iti bukod da a pagsayaatan isu a nagdesisyon a saanen nga agpapili ken saannan nga ituloy a kasango ti anak na ti bunyag a ni re-electionist Vice Mayor Atty. JJ Bueno.
Mainaig dayta, inallukoy na dagiti kalugaranna a saan da nga ibotos dagiti kandidato a ti bukod da laeng a personal nga interes iti itantandudo da ken ti kalikagum da nga agturay iti ili ti ipangpangrunana da, saan ket di a ti pudbo a panagserbi kadagiti tattao.
