VIGAN CITY – Kaso a panaglabsing ti Presidential Decree 1602 iti sangwen dagiti uppat nga agmamahjong idiay Brgy. Pantoc, Narvacan a nakemmeg iti naiwayat nga anti illegal gambling operation.
Dagiti suspek ket da Joe Tapalgo, agtawen ti tallo pulo (30) , maysa a crew; Sonia Cabusora, agtawen ti innem a pulo ket pito (67); Pilar Abulog, agtawen ti innem a pulo ket tallo (63) kenni Betty Cabuora, agtawen ti pito pulo ket siam (79) nga agpapada nga agnaed iti nasao a lugar.
Segun ken ni Police Captain Arcadio Viloria, hepe ti Narvacan Municipal Police Station, idi adda naawat da nga impormasyon inaig iti ka-adda dagiti agsusugal iti nasao a barangay ket nangiwayat da iti operasyon a naka-aktoan da kadagiti uppat nga agmamahjong iti uneg iti pagtaengan ni Antonette Arquines.
Inaklon ni Arquines nga arigna kanayon nga agmamahjong dagiti suspek iti pagtaengan da ngem inkalintegan na a paglinglingayan da laeng iti panagsusugal da.
Naala kadakuada ti maysa a set ti mahjong, uppat a tugaw, maysa a lamisaan ken pusta a dua gasut walo pulo ket uppat (PHP 284) a pisos.
