VIGAN CITY – Nakaawiden dagiti aglolo a mangngalap kalpasan ti uppat nga aldaw a panagtalinaedda iti kabaybayan kalpasan a nadadael ti bangka a naglugananda a napan nagkalap.
Dagiti aglolo ket da Armando Mostales, agtawen ti innem a pulo ket tallo ken Melvin halagao, agtawen ti sangapulo ket innem nga agpada nga agnaed idiay Barangay Apatot, San Esteban.
Iti pannaki-uman ti Bombo Radyo Vigan ken ni Mostales, parbangon iti Hunyo 29 iti agdama a tawen idi napanda iti taaw ti apona ngem apaman a nakaalada iti ikan ket agawidda koman, idin nadadael ti makina ti bangka isu a saanda a nakaawid ti malem.
Segun ken ni Mostales, tallopulo ket tallo a milya manipod kadagaan iti kaadayoda ket tapno saan a makaadayon ti bangka ket inggalotda iti payaw ket inabotda iti uppat nga aldaw ken tallo a rabii.
Imbingayna nga agkil-kilaw dan iti ikan ken uin-inomda iti danum ti baybay tapno mapedped ti bisinda.
Nupay kasta, adda dagiti padada a mangngalap a napan nagkalap a gappuanan ti pannakakitada kadakuada isu a naisalakanda ket nakaawiddan iti pagtaenganda.
VOICE OF ARMANDO MOSTALES
Saan met a nagbuteng ti apo ni Armando a ni Melvin ta numan pay narigat ti napasaranda ket natalek a makalasatda ta ammona a saan a mabaybay-an isuna.
Kabayatanna, kanayon met iti panangpalagip ni Reynaldo Oandasan kadagiti mangngalap a saanda a mapan ti taaw nu awan ti kaduada ta adda latta amakna tunggal mapanda agkalap ngem adda latta talekna ken ni Mostales gapu ta adun ti kapadasanna.
VOICE OF REYNALDO OANDASAN
