VIGAN CITY – Nagyelo iti paset ti maysa a camp site iti aglawlaw ti Mt. Apo idiay Kidapawan City, North Cotabato.
Iti pannaki-uman ti Bombo Radyo Vigan ken ni Arnie Macañeras a Guide iti Mount Apo, actual a naimatanganda ti panagyelo iti nasao a lugar idi bigat ti Lunes ta nakariingda laengen a napalus iti lamiisna.
Segun ken ni Macañeras, idi Domingo iti malemna ket nabara pay laeng iti panniempo ngem idi alas syeten iti rabii ket nangrugin a limmamiis agingga nakitada laengen a nagyelon ti linnaaw.
Napalaus iti ragsak dagiti mountaineer a nakapadas iti panagyelo iti lugar ta kaaduan a kadakuada ket umuna a gundawayda a napadasan iti kasta a kalamiis a temperatura.
Saan met nga umuna a gundaway ken ni Macañeras a napadasanna a nagyelo iti nasao a lugar ta napadasannan idi 2019 iti kasta met la a kalamiis a panawen.
Kabayatanna, inimbitaranna dagiti mountaineers a kayatna nga umulo iti Mt. Apo a mapanda agpasyar tapno mapadasda iti kalamiis ita iti nasao a lugar.
VIDEO – ARNIE MACAÑERAS
