VIGAN CITY – Nakemmeg ni Myrna Agapinan, agtawen ti lima pulo ket tallo, naasawaan, agnaed idiay Brgy. San Pedro, Vigan City ken aglaklako ti ikan ta naduktalan a dagiti ilaklakona ket nabungbungan wenno nakalap babaen iti panagaramat ti dinamita idi naginspeksyon kadagiti tiyendaan ni Provincial Fishery Coordinator Benny Saraos.
Segun ken ni Police Chief Master Sergeant Danilo Tolentino, Deputy Chief iti PNP- Maritime ditoy probinsia, nasurok tallo pulo a kilo ti bilis ti naala da ken ni Agapinan a mapapati a nabungbungan.
Agsipud iti dayta, maiyuray iti desisyon iti korte nu agmuwelta wennu maibalud ni Agapinan gapu iti panaglabsingna ti Section 126 ti Republic Act 8550 wennu ti possessing, dealing in or disposing illegally caught or taken fish.
Kabayatanna, nadakamat ni Saraos a nalaka laeng a mabigbig dagiti ikan a nakalap babaen ti bungbong ta nu pislen ket rumuwar iti presko a dara iti asang na ken dagiti mata iti ikan ket nalabbaga.
Nu pay kasta, inlawlawag na nga awan iti dakes nga epekto na iti bagi ti tao nu makasida da iti ikan a nabungbungan ngem nainget a maiparparit iti illegal fishing ta madadael dagiti corals a pagitlogan dagiti ikan kasta pay a mairaman a makalap dagiti babassit nga ikan.
