VIGAN CITY – Karaman dagiti agkasinsin a da Engr. Trishia Camille Tagorda ken ni Engr. Alondra Tagorda Tablit kadagiti sangapulo ket uppat a pimmasa a graduate iti University of Northern Philippines iti Sanitary Engineering Licensure Examination.
Iti pannaki-uman ti Bombo Radyo Vigan ken ni Tagorda, saan unay a deretso ti panag-review-da ta saanda a masigurado idi no matuloy ti exam ngem idi naamuanda a matuloyen ket impasnekdan ti nagreview ket napanda idiay Manilan idi January 2, 2021.
Segun met ken ni Tablit, inaldaw ti apanda panagkararag nga agkasinsin iti kapiliada tapno agkiddaw iti pannarabay ti Dios.
Tallo nga aldaw ti kapaot ti exam para iti innem a subjects ket iti kada aldaw, i-take da ti dua a subject.
Nadanaganda agsipud ta umuna pay laeng a subject ket narigaten isu a saandan a makapagpanunot iti positibo ngem pinalpalag-anda ti rikna iti tunggal maysa kadagiti kakaduada. Ti pannakaipasada ti exam ket sagutda iti Dios, nagannak ken ti lolada a natay iti mismo nga aldaw ti exam-da idinto a plano dagiti agkasinsin ti agsapul a dagus ti trabaho no maalada ti lisensyada ta kayatda a matulongan ti nagannakda.
