Nasapa a binallaagan ni ABC President Barangay Captain Bong Cacho iti Pasung-ol, Santa, Ilocos Sur dagiti kalugaranna nga agsagana iti iduduprak ti bagyo Nika.
Iti pannaki-uman ti Bombo Radyo Vigan ken ni Cacho, ti addang nga inaramidna ket kas panangsurot iti balakad kadakuada ni Mayor Jesus Popoy Bueno a nasken nga agkaykaysada a mangkita ken mangaywan kadagiti kalugaranda.
Binalakadan ni Cacho dagiti agindeg nga iti nasapsapa ket ikabildan iti nataltalged a lugar dagiti alikamenda ta no dumteng ti bagyo ket saandanton a pakasikuran nga iyalikaka ket bagidanto laengen ti ibakwitda ket saanda nga agsublin iti pagtaenganda, a no dadduma ket isu ti pakaisagsagmakanda.
Ipasiguradoda met a maisina ti lugar a pakaibakwitan dagiti masikog, senior citizen ken persons with disability ta isuda ti narisrisgo ti kasasaadna.
