VIGAN CITY – “Saan kami pay laeng a nakabangon” dayta man ti immuna nga imbalikas ti Punong Barangay Henry Rosario ti Amguid, Candon City iti napasaran da a panagrikki ti daga idiay Zone 2 a nakadadaelan ken limnedan dagiti adu a pagtaengan da gapu ti nepnep idi napalabas a tawen.
Segun ken ni Rosario, nu dumteng ti panagtutudo kasla itatta a panawen, agdandanag da latta ta amangan nu maulit iti napasamak kadakuada idi napalabas a tawen ngem awan pay met iti napaliiw da a pagilasinan.
Ti agdama, mailepleppasen dagiti pagtaengan nga umalisan da nga indonar iti gobyerno ket kinuna na nga addan sangapulo ket innem a units a naipatakder iti mismo a relocation site.
Sumagmamno kadagiti kalugaran na ti pimmanaw ket nagkamang da kadagiti kakabagyan da ken adda pay dagiti nagipatakder iti bukod dan a pagtaengan ta saan da a makauray kadagiti mapatpatakder a pagtaengan nga umalisan da.
