VIGAN CITY – Agtaltalinaed pay laeng iti state of shock wennu pannakakigtot dagiti agnaed idiay Tagaytay City iti napasamak a phreatic eruption ti Bulkang Taal.
Ti pannaki-uman ti Bombo Radyo Vigan ken ni Florenz Lerpida nga agnaed idiay Tagaytay City, saan da a ninamnama a phreatic eruption gayamen iti nakita da idi kalman a panagipugso iti asok ti nasao a bulkan ta ti ammo da ket normal laeng nga aktibidad iti bulkan.
Ngem idi madlaw da a ti ipugpugso a dapo ti bulkan ket addan iti nayon na a dapo ken bato, nagbalaw da isu a nagbakwit da iti kaasitgan a hotel iti lugar da ngem adu dagiti tattao a nakacheck in gapu met laeng iti nasao a pasamak isu nga inyanus da iti nagtalinaed iti agpatnag iti ground floor ti hotel.
Immapela ni Lerpida kadagiti maseknan nga ahensya iti taraon, nadalus a danum a mainom ken face mask para kadagiti pada da a bakwit nga agkamang kadagiti evacuation center tapnu saan da a marigatan dagiti ubbing a kadua da.
