VIGAN CITY – Karaman dagiti agina a Pilipino kadagiti uppat a pulo ket innem a natay iti pannakauram ti pito kadsaaran a pasdek idiay Dhaka, Bangladesh gapu iti panagbettak ti expired a gas cylinder a maar-aramat iti maysa a restaurant.
Nabigbig dagiti Pinoy a natay a ni Honeylyn Rodriguez, agtawen iti uppat a pulo ket ti anakna a ni Bianca, agtawen iti sangapulo ket walo, taga-Zamboanga City.
Iti pannaki-uman ti Bombo Radyo Vigan ken ni Bombo International Correspondent Fatima Jalal manipud idiay Dhaka, Bangladesh, natay dagiti agina gapu iti pannaka-suffocate da idinto a dagiti dadduma ket natayda met gapu iti itatapwakda iti pasdek a maur-uram.
Ti kinaawan ti disiplina ken ti saan a panangsurot kadagiti safety precautions dagiti dadduma nga agtagikua kadagiti pananganan ti makitkita a rason no apay a napasamak ti uram kas koma iti nasken a panangsukatda iti kada tallo a bulan kadagiti gas cylinder.
Kunana a ti laeng ngamin napateg kadagiti owner ket ti kuarta a mapastrekanda isu a no dadduma ket maikompromiso ti kinatalged dagiti tattao.
