VIGAN CITY – Natukkol iti akin-kannawan a luppo ti maysa nga ubing a lalaki kalpasan ti pannakaaksidenteda bayat ti panagmotorsikloda ti inana a ni Melva Unciano Urubio, agtawen iti tallopulo, naasawaan, helper nga agnaed idiay Patong, Magsingal ta naatrasan ida ti Isuzu dump truck a minaneho ni Lorenzo Romino Relon, agtawen iti limapulo ket pito, naasawaan, nga agnaed idiay Barangay Namalpalan, Magsingal, Ilocos Sur.
Iti pannaki-uman ti Bombo Radyo Vigan ken ni Patrolman Jaypee De Jesus manipod iti Magsingal Municipal Police Station, agpada nga agpapaammianan a direksyon dagiti dua a lugan idi nagsardengda gapu iti matartarimaan a kalsada idin ta ti akin-sango a dump truck ket nagatras isu a naatrasanna dagiti nagkalugan ti motorsiklo a gappuanan ti pannakatukkol ti luppo ti ubing.
Segun ken ni De Jesus, saan a napansin ti driver ti truck nga adda lugan ti likodna ta blind sight ti ayan ti nagmotorsiklo isu a naammoanna laeng nga adda lugan iti likodna idi naatrasannan.
Gapu ti sinagaba a dunor ti agtawen innem a lalaki ket naipan iti Ilocos Sur District Hospital Magsingal ngem naiyakar iti Ilocos Sur Provincial Hospital – Gabriela Silang para iti pannaka-operana.
Nupay kasta, nagsaritan dagiti dua a driver ket nagtulagda a pagtinnulonganda dagiti magastos para iti pagpaagas ti ubing.
VIDEO – PATROLMAN JAYPEE DE JESUS
