VIGAN CITY – Maysa a babai a taga-Pangasinan iti natakawan bayat ti panagturongna iti probinsia tapno sapulen ti ama dagiti dua nga annakna.
Iti pannaki-uman ti Bombo Radyo Vigan ken ni alyas Iza, siam a bulanen a saan a nagpadlaw ken nangted suportar ti ama ti annakna isu a nagturongdan ditoy Ilocos Sur tapno sapulen ngem napukawanda pay laeng.
Segun ken ni alyas Iza, dati a nagtrabaho ti kaayan-ayatna idiay Pangasinan nga isu nagam-ammoanda ngem naiyakar ditoy probinsia idi lockdown gapu pandemic.
Nupay naamwanna a maikaduada laeng a pamilia isuda idi naiyanakna ti anakda ket binay-annan ti maipapan ti relasyonda ta ipangrunana a kiddawen ti suportana ti annakda.
Ti kakaisuna a kuartada a P3,200 ket napukaw pay laeng isu a nagkiddaw iti tulong kadagiti driver ti tricycle a nakaparking idiay Salindeg ket kinunada nga agturong isuda iti Bombo Radyo Vigan.
Intulod ken saanen a pinag-plete ti tricycle driver a ni Benedict Quidolit addaa ti plate number a VGN 0169 dagiti agi-ina apaman a naidanonna isuda ditoy Bombo Radyo Vigan nga isu metten ti nagkamanganda.
Kiddaw laeng ni Iza a tulongan isuna ti dati a kaayan-ayatna a mangsuportar kadagiti annakna ta isu latta ti ama aniaman ti mapapasamak.
