Inlawlawag ti maysa nga OB-Gynecologist nga adu iti wagas a maaramid tapno maddaan iti napintas a family planning kadagiti couple.
Iti pannaki-uman ti Bombo Radyo Vigan ken ni Dr. Glenda Rabino, adu dagiti rumbeng nga ikonsiderar no kayat ti maaddaanen ti pamilia pakairamanan ti panangkita iti salun-at ken tawen.
Segun ken ni Dr. Rabino, kadagiti addaanen ti anak ket masapul a planoen a nasayaat no kaano manen iti sumaruno a maaddaan tapno saan a marigatan.
Babaen dayta ket tapno malapdan iti agsasaruno nga anak ket inlawlawag ni Dr. Rabino a mabalin nga ikonsiderar iti agduduma a contraception a kas iti natural, hormonal wenno non-permanent ken permanent a wagas.
Kinunana a no natural ket masapul a regular iti panagbinulan ti babai ken masapul nga agkontrol dagiti couple ti contact-da ken suroten ti cervical wenno calendar method, kasta pay a no ti discharge ti babai ket nagalis, clear ken kasla adda itlogna ket saan a mabalin ti contact.
No iti biang met iti non-permanent wenno hormonal ket isu iti panag-pill, ag-inject, IUD, implant ken non-progesting; ken no met permanente ket masapul a maputed ti fallopian tube iti babai idinto a ti vas deference met iti lalaki.
Kabayatanna, impaganetget ni Dr. Rabino a no husto laketdi iti panagusar ti contraception ket awan ti agbalin a parikot kadagiti couple.
