VIGAN CITY – Naisayangkat iti search warrant operation iti pagnanaedan ti maysa a reservist idiay Sitio Raniw, Camarao, Narvacan.
Iti pannaki-uman ti Bombo Radyo Vigan ken ni PMaj. Arcadio Viloria iti Narvacan Municipal Police Station, naglabsing ti Republic Act 10591 ni Freddimar Calayag Saldua, agtawen iti limapulo ket innem gapu iti panagikotna iti agduduma a paltog ken bala.
Ti panagtitinnulong dagiti pannakabagi ti linteg ket naisayangkat ti search warrant a napetsaan idi September 20 nga inruar ti RTC Branch 72, Narvacan a nakaalaan ti Cal.45 Colt. Pistol, innem a magazine iti cal.45 pistol, uppat a pulo ket dua a live ammunition iti cal.45, sangapulo a magazine para iti cal. 5.56mm rifle, 767 a piraso iti live ammunition iti 5.56mm, ken sangagasut ket maysa a live ammunition para iti Cal. 30 a paltog.
Segun ken ni Viloria, nupay maysa a reservist ni Saldua ket saan a mabalin nga agikot iti saan a dokumentado a paltog ken nu adda man issue a paltog kadakuada ket saanda a mabalin nga agiyawid.
Innayonna a babaen met iti pannakitinnulong dagiti pulis barangay iti nasao a lugar ket nakemmeg ni Saldua.
Iti sabali a bangir, impakaammo ni Viloria a maaddaan ti LTOPF wenno License To Own and Possess Firearm inton October 12 ken 13, 2022 iti ili ti Narvacan iti covered court iti sangwanan ti nasao nga ili tapno maikkan ti gundaway dagiti adda ikotna ti paltog a makalisensya.
