VIGAN CITY- Blangko pay laeng dagiti otoridad iti pakabigbigan ken motibo dagiti nangtambang iti agdama a barangay chairman idiay ili ti Sta. Maria idi alas – 12: 30 iti parbangon, April 24 idiay Brgy. Gusing iti nasao nga ili.
Ti biktima ket nabigbig a ni Gusing Brgy. Chairman Severino “Bennie” Dagdag nga agtawen iti innem a pulo, naasawaan ken agpapili a konsehal iti ili inton May 13 midterm elections.
Ti eksklusibo a pannaki-uman ti Bombo Radyo Vigan ken ni P/ Capt. Arcadio Viloria, naggapu ti biktima iti maysa a despidida ti kasar ta maysa isuna kadagiti ninong ket idi agawiden, isun iti panangtambang kenkuana dagiti mapatta-patta a tallo a suspek.
Napartak iti panagpataray ti biktima iti motorsiklo a nagluganan na ta sumang-at kuman iti kalsada a mapan iti balay da isu a saan na a nasiputan dagiti nangtambang kenkuana.
Tama laeng iti akin-kannawan a saka iti sinagaba ti biktima isu a nakapagpaarayat kadagiti kakabagyan na nga asideg iti nakapasamakan iti krimen.
Naala iti crime scene iti sangapulo ket uppat a basyo ti cal. 45 ken siyam a basyo ti cal. 9 mm nga isu iti mapapati nga inaramat dagiti suspek.
Kabayatanna, nangidiaya ni Mayor Edgar Florendo iti PHP 200,000 a gunguna nu siasino iti makaited iti impormasyon tapnu masolbar iti nasao a krimen.
