VIGAN CITY – Nakemmeg dagiti agassawa a mangisursuro ken retirado a pulis iti border control checkpoint idiay Tagudin a nanggandat a sumrek ditoy probinsia nga awan dagiti papelesda.
Nabigbig dagiti suspek a da Vivian Morales, agtawen iti uppat a pulo ket tallo, mangisursuro ken ni Antonio Morales, agtawen iti uppat a pulo ket uppat, retirado a pulis nga agnaed idiay Tomling, Malasiqui, Pangasinan.
Iti pannaki-uman ti Bombo Radyo Vigan ken ni Police Captain Jose Bandong II, idi sapulenda ti papeles dagiti suspek ket imparang ti retirado a pulis ti daan nga ID na ken awan dagiti dadduma pay a kasapulan tapno mapalubosanda a makastrek iti probinsia.
Gapu ti dayta, binilin dagiti pulis nga agsublida pay a mapan mangala kadagiti kasapulanda ket idi saan a nasiputan isuda dagiti pannakabagi ti linteg ket insigida a pinatarayda ti motorsikloda a nagpaamianan a direksion ngem natiliwda met laeng.
Kabayatanna, innem a ribo a pisos ti pyansa a nailatang iti mangisursuro a ni Bernadet Coquia, agtawen iti tallopulo ket siam, taga-Mc Arthur Highway, San Miguel Calasiao, Pangasinan a nakemmeg met laeng iti border control checkpoint gapu iti panagpasuksokna kadagiti pannakabagi ti linteg kasukat ti iseserrekna ditoy probinsia.
