VIGAN CITY – Maysa ti kritikal ti kasasaadna iti napasamak nga aksidente idiay Alilem-Sudipen National Road, Barangay Alilem Daya a nakairamanan ti maysa a motorsiklo a minaneho ni Arnel Manzano Peralta, agnaed iti Barangay Rimos 4, Luna, La Union ken ti backrider-na a ni Raynald Manzano Orillos, agtawen iti tallopulo, agnaed iti Brgy. Patpata, Balaoan, La Union.
Segun ken ni Michael Manzano Orillos, katrabahoan ken kaanakan dagiti bitima, alas dyes singkwenta y singko iti rabii idi pagpagawidenda ti ulitegda.
Kabayatan ti panagpatpatrolya dagiti kameng ti Alilem Police Station iti nasao a lugar, maysa a concerned citizen ti nangipakaammo nga adda natinnag a motorsiklo.
Tinurong dagiti pannakabagi ti linteg ti lugar ket nasarakanda dagiti biktima a natinnaig iti irigasyon.
Malaksid iti backrider a kritikal ti kasasaadna, nagsagaba pay met ti dunor ti nadumaduma a paset ti bagina ti drayber.
Natakuatan a ti laeng drayber ti nakasuot iti helmet idi mapasamak ti aksidente.
