Naipaagas iti ospital dagiti agapo kalpasan ti panagdinnungpar dagiti minanehoda a motorsiklo iti provincial road ti Barangay Codoog, Narvacan, Ilocos Sur.
Ti Suzuki Raider motorcycle ket minaneho ti lalaki nga agtawen iti tallopulo ket dua idinto a ti Honda Beat 125 motorcycle ket minaneho ti lolana nga agtawen iti innem a pulo ket walo, agpada a taga-Barangay Codoog.
Iti pannaki-uman ti Bombo Radyo Vigan ken ni PLT. Reynal Ramos iti Narvacan Municipal Police Station, agpapadaya ti Raider idinto nga aggapu met iti bangir a linya ti Honda BEAT ket pinadas ti Raider a lisyan ti sumungad a lugan ngem napasamak latta ti panagdunnungpar.
Natukkol ti kannawan nga abaga ti senior citizen ken nagasgasan met ti drayber ti Raider.
Aminado ti drayber ti Raider a napaspas ti patarayna idi mapasamak ti panagdinnungpar ken agpada nga awan ti helmet dagiti karaman.
Saan met nga interesadon ti drayber ti Honda Beat a pilaan iti kaso ti drayber ti Raider ta apona met laeng daytoy.
