VIGAN CITY – Daan a susik ti mapapati a nangbagkongan dagiti agama a suspek ken ni Randy Espadero, agtawen iti tallopulo, partidor a taga-Barangay Baliw Laud, Sta. Maria.
Nabigbig dagiti suspek a da Glen Carl Mendoza, agtawen iti duapulo ket dua ken ni Carlito Mendoza, agtawen iti limapulo ket dua, agpada nga agtagilako ken agnaed iti Barangay Baliw Laud iti nasao nga ili.
Iti pannaki-uman ti Bombo Radyo Vigan ken ni Police Staff Sergeant Rodel Ramos, imbestigador iti kaso, nakiinom ti biktima iti kasera ni Della Cabotaje ta ag-birthday ti maysa kadagiti kabsat ti biktima idin ta nangngegna nga agpukpukkaw ti nabartek a kabsatna a ni Joseph Espadero a mangkarkarit iti suspek isu a rimuar met ti biktima tapno pasardengen ti kabsatna.
Sipud dayta, impukkaw met ti biktima kadagiti suspek iti “awan ti kabutengko uray asino kenyayo” ket gapu ta rimsuan ti riri, nangala ti suspek a ni Carlito iti landok ket pinuntaanna ti tengnged ti biktima.
Immamin met ni Carlito nga isu ti pimmak-ol ngem awan ti nangaminen kadakuada no siasino ti bimmagsol iti biktima a nakapuntaan iti akin-kannigid a pingping ti ubetna.
Naala iti nakapasamakan ti krimen ti sangapulo ket dua a pulgada a kutsilyo ken ti metallic tube wenno landok.
Nupay kasta, maidalan iti autopsy ti bangkay ti biktima tapno maduktalan no ania ti impatayna idinto a dagiti suspek ket sumango iti kaso a homicide.
