VIGAN CITY – Natay ni Edward Inofinada nga agtawen ti tallo pulo ket pito idinto a ti ama na a ni Calingayan, Sinait Barangay Chairman Leonardo Inofinada nga agtawen ti innem a pulo ket innem ket matamtaming idiay ospital ta pinaltugan ida dagiti saan pay nabigbig a suspek idi alas otso idi rabii, November 18 idiay Jordan, Sinait.
Nakalugan iti tricycle dagiti agama idi pinaltugan ida dagiti suspek a nagpadaya a direksyon idi nalpasen iti pammaltog.
Agsipud iti dayta, naitaray idiay Sto. Cristo Milagroso Hospital dagiti biktima babaen kadagiti nagresponde a kameng ti Sinait municipal police station ngem naideklerar a dead on arrival ni Edward ta nagsagaba iti tama iti paltog iti ulo ken barukong na idinto a ti ama na a ni Leonardo ket naiyalis idiay Metro Vigan Hospital tapnu naan-anay a mataming iti tama iti paltog iti luppo ken takyag a sinagaba na.
Manarimaan pay laeng iti naun-uneg nga imbestigasyon dagiti otoridad iti krimen tapnu maamuan nu siasino dagiti suspek ken nu anya iti motibo da.
Naala iti nakapasamakan iti krimen ti lima a kapsula, maysa a slug, maysa a deformed slug ken bala ti caliber 45.
