Nakemmeg dagiti agama a suspek iti pammagkong idiay Barangay Magsaysay District, Santa, Ilocos Sur ket sangwenda ti kaso a murder.
Ti biktima ket agtawen iti sangapulo ket siam idinto a dagiti suspek ket pakairamanan dagiti agama nga agtawen iti sangapulo ket siam, construction worker ken agtawen iti uppat a pulo ket walo.
Dagiti suspek ken biktima ket agpapada nga agnaed iti nasao a lugar.
Iti pannaki-uman ti Bombo Radyo Vigan ken ni PLT. Oscar Ryan Polca, kinabartek ti makitkitada a rason ti pasamak ngem agtultuloy ti panagimbestigarda no adda pay naun-uneg a rason no apay a nagriririda.
Maibasar iti imbestigasion, nakita ti witness ti nalaklakay a suspek a binagkongna ti biktima manipud iti likudan a nagsagabaan ti biktima iti fatal wounds iti bukot ken kilikilina.
Pinadas ida nga anawaen ti witness ket naigawidna met ti ima ti suspek sa inyadayona daytoy manipud iti biktima.
Nangiwayat dagiti pannakabagi ti linteg iti hot pursuit operation a nagresulta iti pannakakemmeg dagiti suspek iti uneg ti pagtaenganda ket sangwenda ti kaso a murder.
Kabayatanna, desidido met ti ama ti biktima a mangidarum kadagiti suspek a nagbagkong iti putotna.
Segun iti ama, maladingitan iti napasamak ta ti namnamaenna ket aganawa koma met ti ama a suspe iti napasamak.
