Maisagsaganan ti kaso nga estafa kadagiti ag-live in partner a nanglimlimo kadagiti agassawa a taga-Barangay Becques, Tagudin, Ilocos Sur.
Dagiti suspek ket agpada a taga-Barangay Rizal, Santa, owner iti Anib Guns, Ammo, and Sports.
Dagiti biktima ket gimmatang kadagiti suspek iti paltog ken naikari kadakuada a maiproseso payen ti License to Own and Possess Firearms, ken ti Permit to Carry a Firearm-na.
Iti pannaki-uman ti Bombo Radyo Vigan ken ni Police Captain Rovic Nelmida, idi June 4, 2025, napan dagiti biktima iti pagtaengan dagiti suspek a makitransaksyon iti gatangenda a paltog ken ti pannakaiproseso ti LTOPF-da, ket nagitinnagda iti PHP70,000.
Nagpanayon manen ti suspek iti P25,000 para iti transportasyon, taraon ken lodging a maaramat para iti proseso ngem gapu ta nabayagen ti panagur-uray dagiti biktima ket ibabawida koman ngem im-block ida dagiti suspek ken saandan a makontak.
June 16, 2025, nangaramid dagiti biktima iti 10-day demand letter kontra kadagiti suspek para iti refund, ngem saanda a simmungbat.
Idi met July 1, 2025, napanda iti ili ti puesto dagiti suspek ngem natakuatan a daytoy ket nagsarran gapu kadagiti sumagmamano a reklamo.
Naduktalan dagiti pannakabagi ti linteg a ti babai a suspek ket datin nga adda kasona nga alarm and scandal iti ili ti Bantay.
