VIGAN CITY – Natay dagiti aglive in partner iti napasamak a panagdinnungpar ti motorsiklo ken closed van idiay idiay Barangay San Pablo, San Esteban, Ilocos Sur.
Nabigbig ti nagmaneho iti Isuzu aluminum closed van a ni Manuel Francisco Nepomuceno Jr., agtawen iti tallopulo, taga-Balasan, Iloilo ngem agdama nga agnaed iti Batong Dalig, Kawit, Cavite kaduana ti helper a ni Rhybert Delfin Sibayan, agtawen iti duapulo ket pito, taga-Urbiz Tondo, Pangasinan.
Kabayatanna, ti met nagmaneho iti motorsiklo nga Honda ADV150 ket ni Joseph Tuscano Curbi, agtawen iti limapulo ket lima, taga-Barangay Patoc, Bucay, Abra, backrider-na ni Geraldine Garcia Loleng, agtawen iti limapulo ket innam, taga-San Roque, San Manuel, Pangasinan.
Iti pannaki-uman ti Bombo Radyo Vigan ken ni Police Captain Rovic Nelmida, agpapa-amianan ti close van idinto nga adda met iti bangir a linya ti motorsiklo, ket idi magtengda ti nakapasamakan ti insidente kangrunaan iti kurbada a paset ti kalsada, nagdinnungpar dagiti dua a lugan gapu iti mapapati a panangagaw ti linya ti nagmotorsiklo.
Gapu ti kapigsa ti impact, natinnag dagiti nagkalugan iti motorsiklo iti kalsada ket inarado ti closed van.
Nagsagaba iti nakaro a dunor dagiti nagkalugan iti motorsiklo a naipaagas iti ospital ngem saandan a nakalasat idinto a ti drayber ti closed van ket nagsagaba met iti bassit a dunor.
