VIGAN CITY – Kinumpirmaran ti Department of Agriculture Region 1 a nakastreken ti African Swine Fever iti siudad ti Vigan ta nagpositibo ti siam a whole blood sample dagiti baboy idiay Brgy. Pantay Fatima.
Nupay kasta, nabigbig dagiti lugar nga adda iti asideg ti ayan ti impeksion isu a madalusan ken ma-disinfect idinto a ma-depopulate nga insigida dagiti naapektaran a baboy ken dagiti na-expose iti 500 meter radius manipud iti lugar ti impeksion.
Malaksid ti dayta, as-asikaswenen ti city government ti napaspas a pannakaited ti indemnity fund kadagiti naapektaran a hog owner ken raisers.
Sakbay ti laboratory testing ket naipakat ti amin a preventive measure, pannakaiwaras ti disinfectant, regular farm monitoring, ken pannakaipatungpal dagiti pagannurotan.
Impasigurado ni Mayor Juan Carlo Medina nga addada a katulongan dagiti umili a mangikkat iti ASF iti siudad.
