Makikamkammayet ti Armed Forces of the Philippines iti National Disaster Risk Reduction and Management Council tapno masigurado a napaspas ti panagresponde kadagiti didigra ita a panagtutudo.
Segun ken ni AFP Spokesperson Colonel Francel Margareth Padilla, aktibo dagiti unified command ken task forces a makikammayet iti NDRRMC ken dadduma pay nga ahensia ti gobierno tapno masigurado ti dagus a tignay no adda didigra.
Ti AFP ket adda prepositioned assets-da ken trained personnel kadagiti high-risk a lugar a mabalin a dagus a maideploy no kasapulan.
Agtultuloy ti regular ken advanced training kadagiti disaster response operations, agraman ti water search and rescue, casualty evacuation ken first aid tapno mapagtalinaed ti kinasagana dagiti kameng.
Dagitoy nga addang ket paset iti nalawlawa a plano ti gobierno tapno mapasayaat ti disaster preparedness ken response capabilities iti baet dagiti karit ti masansan a didigra ita a panagtutudo.
