Mangisagana ni Atty. Levi Baligod iti affidavit tapno kontraen ti statement dagiti uppat a dati a “maleta boys” a nangibabawi kadagiti testimoniada kontra kada dati a House Speaker MartinRomualdez, dati nga Ako Bicol Rep. Zaldy Co, ken ni Presidente Ferdinand Marcos Jr.
Segun ken ni Baligod, adda dagiti testigo a makapaneknek nga awan ti pammutbuteng nga inaramid dagiti abogado ti Ombudsman kabayatan a maal-alaan iti salaysay dagiti bodyguard.
Nupay kasta, kunana a nabayagen a makapadpadas iti pangta, psychological pressure ken financial pressure dagiti uppat a testigo a nangibabawi kadagiti statement-da.
Kadagiti 18 a dati a bodyguard a mapapati a nangpabasul iti panangipatulod kadagiti maleta ti kuarta, walo laeng kadakuada ti nakaipasa iti agsisina nga affidavit iti Ombudsman, agraman dagiti tallo kadagiti uppat a nangibabawi iti testimoniada.
