VIGAN CITY – Mamati ni Dr. Rayeth Robeniol ti City Veterinary Office a nasaysayaat no maipa-adaptar kadagiti mangayat nga umili dagiti stray dog a saan a sinaka dagiti akin-kukua tapno maaddaanda ti nasayaat a kasasaad imbes nga agkaraiwarada iti kalsada.
Inlawlawag ni Robeniol a kasapulan a dumalan iti proper adoption procedure dagiti mangayat a mangtaripato kadagiti aso ken lima a ribo a pisos ti muelta no dagiti foster parent ti aso ket saanda a nataripato a nasayaat wenno pinartida.
No pay kasta, responsibilidad met laeng a siguradwen ti ahensiada no nasayaat met laeng iti kasasaad dagiti aso kadagiti nangadaptar kadakuada.
Gagem ti nasao a paglintegan a maksayan iti pannakatay dagiti aso ken masurot iti probisyon a nakailanad iti RA 9482 a saan a karaman ti aso kadagiti maparti ken agbalin a pulutan.
