Binilinen ti Philippine National Police dagiti unit-da iti intero a pagilian a papigsaenda ti visibility-da babaen iti masansan a panagpatrolya ken pannakaideploy ti nayon a personnel kadagiti lugar a nadagsen ti trapiko kagiddan ti umadani a tiempo ti holiday.
Segun ken ni PNP Chief Police General Rommel Marbil, ti kaadda dagiti uniformed personnel kadagiti pampubliko a lugar kas kadagiti mall, tiendaan ken transport hub iti baet ti holiday season ket paset iti misyon ti kapulisan a masigurado ti kinatalged ti publiko.
Innayon ni Marbil a ti Paskua ket panawen ti ragragsak ken panagipaay, ngem panawen pay ti panangbiktima dagiti kriminal iti publiko isu a ti PNP ket dedikado a mangipasigurado a natalged ti season ken mabantayan dagiti amin a Pilipino.
Segun iti PNP, adda pay a sidadaan dagiti quick response team nga agresponde kadagiti insidente a posible a mapasamak.
Malaksid dayta, uray ti PNP Anti Cybercrime Group ket kitkitaenda no kasano a maparmek ti scam ken fraud nga agraraira tunggal panawen ti Paskua.
