VIGAN CITY – Patien ni ACT Teachers Partylist Rep. France Castro a ti pannakaisanud ti klase ket gundaway dagiti mangisursuro a mangisagana kadagiti learning modules a maaramat para iti maipatungpal a blended learning.
Iti pannaki-uman ti Bombo Radyo Vigan ken ni Castro, numan pay adda dagiti pagsayaatan ti pannakaiyakar ti klase inton October 5 ket maibilang latta a panaglabsing iti karbengan dagiti estudiante a makaadal ta adu a panawen ti nasayang.
Gapu dayta, ingunamgunam ni Castro a a rumbeng nga adda ti nasayaat a plano ti gobierno iti panangparmek ti Covid19 tapno saan a maisagmak ti tunggal mangisursuro ken estudiante ita a panawen.
Nupay kasta, namnamaen ti kongresista a saanen a maisanud ti napagtutulagan a petsa iti panaglukat ti klase isu a kasapulan ti pannakikinnammayet dagiti mangisursuro kadagiti nagannak tapno matarabayan dagiti estudiante a makasurot met laeng iti baro a wagas ti panagadal.
