Nangisayangkat ti Alliance of Concerned Teachers Philippines iti Olympic-themed protest iti sangwanan ti Department of Education tapno ipanawagan ti pannaikabasura ti MATATAG curriculum ken ti panangibabawi ni Presidente Ferdinand Marcos Jr iti Executive Order No 64 a mangipaay iti tranches iti insignificant salary increase para kadagiti mangisursuro ken government employees.
Iti pannaki-uman ti Bombo Radyo Vigan ken ni Chairperson Vladimer Quetua, saanda nga ibilang a legasiya ti MATATAG curriculum ta ad-adda laeng a nagparigat kadakuada a mangisursuro gapu ta immado ti trabahoda ngem saan met a mayannatup ti sueldo a maaw-awatda.
Binigbigna pay ti panagisuro dagiti maestra ken maestro iti pito agingga walo a klase iti inaldaw isu nga inyarigda ti bagida kadagiti Olympians a kumamakamat kadagiti klaseda ken ti kaadu dagiti sabali pay a trabaho a sangsangwenda.
Innayonna a dagiti mangisursuro ken education worker, kas met laeng dagiti atleta a mangipapaay iti pakaidayawan iti pagilian ket saan a mabigbigbig iti wagas a nasken koma para kadakuada.
Imbes a patas a gungona ti maawatda, PHP50 laeng iti inaldaw ti nainayon iti sueldoda, adayo nga amang manipud iti kidkiddawenda a PHP50K entry level pay kadagiti mangisursuro ket PHP33,000 kadagiti Grade 1 employees.
