Awan ti malagip ni dati nga Office of the Vice President (OVP) Special Disbursing Officer (SDO) Gina Acosta idi sinaludsod ti prosecution maipanggep ti confidential funds iti Davao City manipod 2019 agingga 2022 idi panawen ni Vice President Sara Duterte kas mayor iti siudad.
Iti maika-sangapulo ket pito nga aldaw ti impeachment trial, impresentar ni House private prosecutor Amando Virgil Ligutan ti maysa nga infographic a mangipakita a nangawat ti Davao City ti P460 million confidential funds kada tawen manipod 2019 agingga 2022 a pakabuklan a P1.84 million.
Kinuna ni Acosta a dati a nagserbi nga special disbursing officer ti Davao City sakbay nga immakar iti OVP, a nabayagen dayta ken nataenganan isu a saanan a malagip.
Agtaka ni Ligutan no apay a saan a malagip ni Acosta iti baet a napasamak laeng ti transaksion iti napalabas nga uppat a tawen.
Kinontra ti defense panel ti panagsaludsod ni Ligutan ken ni Acosta ngem inikkat ti bileg dayta ni Presiding Officer Francis “Chiz” Escudero ken kinunana a naideklarar a maysa a hostile witness ni Acosta.
Immunan a kinuna ni Acosta iti impeachment court a naipan iti uppat a travelling bags ti P125 million cash.
