VIGAN CITY – Anamongan ni ACT Teacher’s Partylist Rep. France Castro iti panawagan dagiti estudiante nga academic freeze nangruna kadagiti lugar a nakaro nga inapektaran dagiti naglabas a bagyo iti Luzon ken Metro Manila.
Iti pannaki-uman ti Bombo Radyo Vigan ken ni Castro, patienna nga adda ti positibo nga epekto ti academic freeze kadagiti naapektaran iti bagyo ken kasapulan nga agbalin a sensitibo dagiti opisial iti Commission on Higher Education pakairamananen ti Department of Education.
Insingasing ti kongresista a rumbeng a kitaen a naimbag ti kasasaad dagiti estudiante ken opisial nga inapektaran ti bagyo ken mangsapulda ti wagas no kasano a mapalag-anan ti kasasaadda.
Nupay kasta, agbirbiruken ti grupoda ti pondo a pangtulong kadagiti mangisursuro a naapektaran iti bagyo kasta payen iti panangkitada a naimbag ti listaan no ania dagiti lugar nga apektado.
