VIGAN CITY–Pormalen a naideklara ti Abra a drug-cleared province idi kalman.
Segun kenni police Senior Insp. Grace Marron, information officer ti Abra Police Provincial Office, ti Abra iti kaunaan a probinsya a naideklara a drug-cleared iti intero a Cordillera Administrative Region.
Karaman kadagiti nakipaset iti deklarasyon ket da PCSupt. Elmo Francis Oco Sarona, regional director ti PRO-Codillera; Dir. Edgar Apalla, Regional Director ti Philippine Drug Enforcement Agency-Cordiellera ; ken Dir. Marlo Iringan, Regional Director ti Department of Interior and Local Governmenrt-Cordillera
Inpakaammo ni Marron a kadagiti 27 nga ili iti probinsiya ket maysa laeng iti saan a drug-affected ngem gapu iti nainget a pannakaipatungpal ti Oplan Tokhang ken Oplan Double Barrel ken iti pannakitinnulong dagiti Local Government Units ken baranggay official, in-inot a nadalusan ti probinsiya manipud ti iligal a droga.
Nu pay kasta,saan nga agsardeng ti Abra-PPO ti kampanya kontra ti iligal a droga ta iti baro a karit ita kadakuada ket iti panangtalinaed ti estado ti probinsiya a drug-cleared.
Inpasigurado ni Marron nga agtultuloy iti programa ti PNP ken LGU para kadagiti simmuko a drug personality tapno saan dan nga agsubli iti iligal nga aramid.
