VIGAN CITY – Naipaayan dagiti mannalon iti tabako iti ili ti Sta. Lucia iti abono a naggapu iti lokal a gobierno idiay Palali Sur, Sta. Lucia babaen ti panangidaulo ni Municipal Mayor Joseph Simon Valdez ken dagiti dadduma pay nga opisial iti nasao nga ili.
Ti PHP10-M a pondo manipud RA 7171 a kiniddaw dagiti mannalon iti tabako ket nayalokar babaen ti inisyatibo ti executive branch kas panangbigbig kadakuada a maibilang a “bread winner”.
Tallopulo ket lima a milion ti nailatang a pondo ita a tawen para ti nadumaduma a programa ti amin a mannalon.
Ita met nga aldaw a maiwaras ti abono kadagiti mannalon ti mais idiay Sabuanan, Covered Court, Sabuanan, Sta. Lucia ken manamnama nga addanto pay maited a gasoline wenno fuel assistance kadagiti mannalon a kas tulong kadakuada tapno ad-adu met laeng ti maganansyada.
